ஒட்டுவதே ஒட்டும்!

கண் கண்டதும்
மதி சொன்னதும்
மனம் உணர்ந்ததும் - பொய்!

கண் திரண்டதும்
மனம் உடைந்ததும்
நான் நொந்ததும் - மெய்!

---- 0 ----

சரி என்றே
எண்ணி வந்தேன்
சிலர் குறித்த புரிதல் தனை!

அது
சரி அல்ல என்றே அவர்
கரி பூசிச் சென்றிட்டார்!

எவர் எனக்கு
அருமை என்று
இருமாப்பு கொண்டேனோ?

அவரே என்
பெருமை மீது
சேற்றினை இறைத்திட்டார்!

--- 0 ---

எல்லை உண்டென்று அறியாத பாவம்
தொல்லை கொடுத்து விட்டேன்!

உரிமை எடுத்து கண்டிக்கத் தான் சில
சொல்லை உதிர்த்து விட்டேன்!

உதிர்த்த சொல் சுட்டதென்றா இவர்கள்
ஊமை என்றானார்கள்? - ஆயின்
உண்மையை உரைக்கட்டும்
எந்தச் சொல் சுட்டதென்று?

---- 0 ----

இடைவெளி கூடுதென்று
இதயம் பதறியதால்
அபயக் குரல் கொடுத்து - உறவை
காத்திடத்தான் எத்தனித்தேன்!

அதுவே தவறென்று
ஆகிவிட்டால் என் செய்வேன்?

இச்செயலே பிரிவுக்கு
உரமாச்சோ? - துயர் கொண்டேன்!

--- 0 ---

அங்கங்கு காலம் ஓர்
அடையாளம் காட்டும்!
அறிகுறிகள் அறிந்து - நாம்
தயாராக வேண்டும்!

அன்றேல்,
எதிர்பாரா ஏமாற்றம்
நமை வந்து சூழும் - அதில்
பழங்கால இன்பமும்
பழுதாகிப் போகும்!

--- 0 ---

அளவாய் எடுத்தும்
அளவுக்குள் கொடுத்தும்
பழகுதல் நன்று!

தேவைக்கு மேல் என்றால்
ஏதும்
திகட்டத்தான் செய்யும்!
அவர்
குமட்டத்தான் செய்வர்!
அதை
குற்றமென் பதறிவோ?

--- 0 ---

வேண்டியதே ஆயினும் - அதை
வேண்டா தவர்க் களித்தால்
வேதனையே மிஞ்சும்!

மிஞ்சியது வேதனை - அது
நல்கியது போதனை!

ஆற்று மணலில் புரண்டாலும்
ஒட்டுவது தான் ஒட்டும்!

------------------------------------------------

சில்வண்டு
ஜீன் 13, 2007